Tottenham captain, Son Heung-min, don reportedly carry complaint go give South Korea police say one woman dey blackmail am with fake belle story.
Dem talk say the woman dey her 20s and one man wey dey im 40s, police for Seoul don dey investigate dem for attempt to collect money by force, as Yonhap News Agency and The Korea Times report am.
Son talk say the people lie give am say the woman get belle, just to try collect hundreds of millions of won from am. One British pound na about 1,859 South Korean won.
Im legal team talk say the woman first claim say she get belle around June last year, and she come dey demand money make she no talk anything.
Son wey be Tottenham captain, 32 years old, wey no get wife or pikin wey anybody sabi, don file the complaint give police last week.
Before before, e don talk say e no wan born pikin until after e retire, because e wan focus on football.
E contract with Spurs go finish next year.
As e tell The Guardian for 2019: “My papa dey always talk am and I dey agree too – once you marry, na family, wife and pikin go come first, before football. But for now, I wan make sure say as I still dey play top level, football go be number one.”
E still talk say: “You no go sabi how long you fit play top football. But when you retire, like at 33 or 34, you still fit enjoy long life with your family.”
Before before, Son don date Korean pop stars like Bang Min-ah and Yoo So-young.
