"Afta 11 years wey na me dey pay all the bills alone, I no go gree share the glory with one kain irresponsible nonentity" – Na wetin one Naija woman tell her pikin papa
One Nigerian woman wey her name be Blessing Paulinus don call out her ex-husband say the man abandon him two children, leave her make she dey do everything alone for almost eleven years.
Blessing talk dis one for one Facebook post wey she drop on May 16. She say after their marriage scatter, the man still get mind vow say e go show her and her family “shege”.
“E don almost reach 11 years now wey na me dey do everything ALONE,” she yarn.
"Make una hol’ up! Na 11 solid years wey na me dey do school fees, hospital, food, clothes, everything wey the girls need, plus every single bill ALONE, and you dey expect say I go just go through all that suffer, then come still share glory with that kind irresponsible man?
Person wey tell me say ‘shebi you think say you stubborn, you get family abi? I go show you and your people shege, you go beg me before you see even one naira from me.’
Person wey I even beg, talk, try make e co-parent for three years afta marriage no work, but the man no gree? Make I still dey waste my energy wey I fit use take better myself or stay alive for that kind person??
Person wey heartless reach to turn him back on him own children when the first born never even reach 5 years, now she don be 15 and the man never look back since then, no even send one kobo??
You think say some men no sabi wetin dem dey do? Lmao!
Make I suffer finish like dis, then my pikin go still dey bear your name?? I dey craze?? Make I come share glory with deadbeat papa??
Nsa Adiaha!!!
Nehi! We no dey do that kain thing for here o!
For children wey I don already go collect new birth certificates for, change their state of origin self?
“When dem grow, dem go find their papa.”
No wahala! But for now, both of dem don write their national exams with my name and I dey proud of myself die!!!
“Bitter single mom”? Yes o!
I carry the name with my full chest, so make una deal with am!"
.
