Police for Abuja don rescue two people wey dey live for Grow Homes Estate, Kuchibuyi village for Byazhin area of the capital wey kidnappers bin carry on May 26.
According to wetin the FCT police spokesperson, SP Josephine Adeh talk, police get distress call around 1am on May 26 from officers wey dey guard the estate say armed men attack the place and them need backup.
When police rush go the place, dem discover say the kidnappers enter the estate from the back fence and carry two people by force. Police exchange gun with the kidnappers for like 40 minutes and dem manage rescue one of the victims, Chinyere Joe. But the kidnappers still escape with the second person.
Adeh talk say the police Anti-Kidnapping unit, together with army and other security people, don start operation to catch the kidnappers and rescue the second victim.
She beg residents make dem shine eye well, work with security people, and report any suspicious movement or emergency through these numbers: 08032003913, 08028940883, and 07057337653.
