Police don discover human skull and juju items for one ‘church’ wey dem raid for Enugu.
Na security people wey the Divisional Police Officer (DPO) of Igbo-Eze South local government for Enugu State lead, raid one church wey dem still dey build, and na there dem see the human skull.
Dem say the church, wey dem call Synagogue, na one Prophet Chinedu Solomon Ezedike own, and dem believe say him get hand for the k#lling of four small children.
Dem k#ll the four pikin some weeks ago for that same area, and the thing vex plenty people for Enugu and even people outside. After the wahala, government sharply demolish the building wey dem say the thing happen for.
But to still check wetin the pastor dey do, government come begin check other properties wey belong to am, and na so dem take find this new one.
Chairman of Igbo-Eze South Local Government, Barrister Ferdinand Ukwueze, confirm the new tori for him Facebook page today, June 9.
E talk say:
“Two days ago, as we dey search places wey we suspect say dem dey use for criminal activities, we follow one better intel go one site for Abile Hill, Isi-Agu, Ibagwa-Aka, with the DPO of Igbo-Eze South and other security people.
The place wey dem dey take build Prophet Chinedu Ezedike so-called Synagogue, come turn out to be one place wey dem dey use do ritual.
To our biggest surprise, na there we find one human skull and one ritual staff. This discovery just add more weight to the wahala and serious matter wey dey surround the allegations against this Ezedike. Police don collect the things wey we find for proper investigation.
We go still find and enter more of these kind hidden places, because we no go rest until we clean crime comot from our Local Government Area.
I wan assure una say under the leadership of our Governor, Dr. Peter Ndubuisi Mbah, no crime go hide. We dey work to build a society where everybody for Enugu State go fit dream and achieve anything without fear of criminals.
I dey thank the Nigeria Police, DSS, Military, Igbo-Eze South Neighbourhood Watch, Forest Guards and all the people wey don help with information and support for this past weeks.
Wetin go make society worse na when good people keep quiet while crime dey happen. Together, make we protect our land.”
