One middle-aged man wey dem identify as Segun Adelere don kpai for inside im motor for New Garage area for Lagos State on Tuesday, June 10.
Na people wey dey waka pass notice say the man dey struggle for breath for inside im car. Dem quickly call members of the Transport Union wey dey around to help.
APC chieftain, Joe Igbokwe, na im share the tori for Facebook. E talk say before help fit reach the man, the man don already give up. Dem don carry the body go mortuary, and dem talk say autopsy go soon happen to know wetin kill am.
Na wetin Igbokwe write be this:
‘’E pain wella yesterday June 10, 2025, when transport union people for New Garage near Lagos-Ibadan Expressway notice say one middle-aged man dey struggle for life inside im motor!
Dem later identify am as Adebowale Segun Adelere, and na for inside one Cherry motor (wey get number LND 483 FV) wey dem park near NGAB filling station dem see am. Him dey struggle to breathe before him come give up for there.
Dem don carry im body go Divine Hospital Mortuary make dem preserve am and do autopsy.
Abeg make una help share dis tori everywhere so dem fit locate any of him people.
If you sabi anything, call dis number: 08077317182’’
