One former Manchester United player, Brandon Williams, don collect 14-month prison sentence wey dem suspend for two years, because of dangerous driving.
Williams show face for court on Friday, and dem don still ban am from driving for three years.
The judge, Recorder Eric Lamb, tell am say e get “strong personal mitigation” because na during depression period e commit the offence.
But the judge still tell am say e behave “stupid” and say e start to earn big money too early after e enter United first team. Williams admit say na to impress one babe wey dey inside the car with am, na im make am dey speed.
Williams don plead guilty for dangerous driving charge since March, after dem catch am dey speed near 100mph before e crash im Audi A3.
The 24-year-old drive anyhow for road, jam one Ford Fiesta, and later crash for center of the A34 road for August 2023.
When dem ask am about the report say people see balloon for him mouth while e dey drive, im no talk anything.
The babe wey follow am for the ride even record video as dem dey move.
Police check am for alcohol on the spot but e test negative. Dem later arrest am for dangerous driving and say e no get third-party insurance.
Andrew Madden, wey be senior crown prosecutor for CPS, talk say: “Brandon Williams driving that day no reach the level wey normal and careful driver suppose dey.
“Witnesses talk say e just dey speed then brake sharp. E clear say e no get full control of the motor.
“E drive anyhow and the speed too much. Last last, e lose control and crash. Na luck say nobody get serious injury or die.”
