Liverpool star boy, Mohamed Salah don collect di 2025 Football Writers’ Association (FWA) Footballer of the Year award for Thursday night.
Salah win di 2025 men’s category after im gather 90 percent of di vote wey come from di 918 members of FWA wey fit vote. Na di biggest win gap for dis century.
Di Egyptian collect dis award because of how im ball well-well throughout di 2024-25 season, wey help Liverpool carry Premier League trophy.
For all competitions, Salah don score 33 goals and give 23 assists from di 51 matches wey im play.
Im Liverpool teammate, Virgil van Dijk come second for di FWA vote, followed by Alexander Isak from Newcastle United and Declan Rice from Arsenal.
Salah talk say, “E mean plenty to win dis award, e dey unbelievable. I always dey feel special when I win this kain award, especially as na from writers. And as di gap between me and second person big like that, e dey mad.
“To win Premier League and impact di team like that, I don talk am before say I never feel that kain happiness for club before, that moment wey we win Premier League against Spurs.”
