Afrobeats superstar Kizz Daniel don come back wit one fresh EP wey e name “Lemon Chase”. Dis EP get seven tracks and e no just be teaser for him next album “Uncle K”, na strong personal project wey touch different tori — from love and heartbreak to peace and enjoyment wey anybody fit relate to. Each song for the EP dey show one emotional angle from Kizz Daniel mind. From the first track “Black Girl Magic” to the last one “Police” wey feature Johnny Drille from Mavin and five-time Grammy winner Angelique Kidjo, Kizz Daniel make sure say e carry people enter different emotional places with him sound.
For “Lemon Chase EP”, Kizz Daniel gather beta artistes wey sabi, and each of dem bring their own swag enter the matter. The smooth voice of Johnny Drille and Angelique Kidjo mix well with the raw, street vibes from Bella Shmurda, Odumodu Blvck, Zlatan, and Fola – the same Fola wey Kizz Daniel do “Lost” with. All of dem join body to give the project that sweet, deep feeling wey show say Kizz Daniel na artiste wey sabi blend any kind music style.
As per who produce the jamz, we get Reward Beatz, Blaise Beatz, Magic Sticks, Bando, and Ayzed — all of dem na people wey don work with Kizz before and don give us hit songs. Reward Beatz produce “Eyo” and “Black Girl Magic” (with Bando and Blaise Beatz), Blaise Beatz handle “Secure” and “Peace I Chose”, while “Titi” na Magic Sticks produce am with small help from Reward Beatz and Blaise Beatz. “Al Jannah” na Ayzed touch am make e sweet.
Kizz Daniel talk say, “When life give you lemons, you gats use am do lemonade. I want make this EP be like real life — sometimes sweet, sometimes sour, sometimes confuse, but still beautiful. Na music wey go touch your heart, whether you dey heal, dey hope, or dey remember. I just wan make am real and true to myself.”
With “Lemon Chase”, Kizz Daniel dey show say e dey grow, no be only as hitmaker, but as storyteller wey no dey fear touch deep matter. This EP na intro to wetin we go expect from “Uncle K” album, and e remind us say the name Kizz Daniel go always dey on top.
